達洋故事集

達洋是一隻熱愛說故事的貓,牠的故事溫馨又殘酷,搞笑又認真,傳統又後現代,充滿宗教哲理又禪味十足,表面簡簡單單其實幾複雜。總之想你笑中有淚,嘻嘻哈哈又用下個腦。

星期六, 11月 18, 2006

故事30:達洋大師之大煞風景


達洋大師同少林寺方丈得閒冇o野做,就去泰山旅行喇。泰山景色雄偉壯觀,令佢地歎為觀止。


方丈望見山下景色,詩興大發,於是運勁使出大力金剛指,o係大石上刻下詩句,「彭彭彭彭」,電光火石,字字入石三分,得詩一首:

腳軟又如何,條氣抖順了。
旅客手指指,陰陽都唔曉。
天空有舊雲,枝頭見飛鳥。
十萬八千尺,一覽眾山小!

方丈問達洋大師:點呀,係唔係好正呢?

達洋大師望見D碎石飛晒出o黎,一地都係,大煞風景,於是搖搖頭。然後舔舔自己前爪D毛,用口水o係另一塊大石上寫詩:

無聊組合到此遊,
方丈刻石一舊舊,
達洋大師口水流,
寫詩風乾無字留。

首詩留左o係石上面幾十秒,轉眼間就唔見左lu。

方丈:阿彌陀佛。


講完。


星期六, 11月 11, 2006

故事29:新碼頭


老船長駕駛渡海小輪,由尖沙咀出發渡過維港,今日煙霧瀰漫,但老船長經驗老到,瞇埋眼都知道幾時到碼頭啦。


渡輪o既馬達「砵砵砵砵」 咁響,老船長最愛依種聲音,雖然個海愈來愈窄,但好在D風仲吹到入o黎。好啦,就到碼頭埋岸啦,老船長望住煙霧裡面o既鐘樓,覺得好靚好親切,突然間,一條大魚彈出水面,一啖將個碼頭吞左落肚……

老船長嚇到呆左,依個時候,大魚痾左一舊大屎,舊屎慢慢從海裡面升上o黎,傳出一陣臭氣。大魚隻眼轉左一圈,同老船長講:「依個係新碼頭呀。」

老船長望住果舊o野,好想喊,但又喊唔出眼淚,佢覺得自己做左幾十年人,最傷心係依一日囉。


講完


星期五, 10月 27, 2006

故事28:走在最前

滴滴仔一日行街,見到旺角街頭有個好似黃德斌o既型仔o係度擺檔,仲有好多人排隊添。個檔口有一個大箱,箱上面有個窿,D人就望埋個窿度,睇得鬼咁開心。

好似黃德斌:埋o黎睇啦!埋o黎睇啦!免費架!

滴滴仔好奇心大發,排埋一份,依個時候,佢先發現睇完o既人,個樣全部變得痴呆,而且仲流晒口水添,雖然核核突突,但好奇心爆開左,就收唔返啦。排左大半個鐘,就快到佢啦!

好似黃德斌:o黎o黎o黎!到你啦,走在最前,慢慢睇!

滴滴仔於是行埋去,望埋個窿度。窿裡面係一個好靚o既萬花筒,不停轉變o既色彩同圖案,睇得人如痴如醉。就o係依個時候,滴滴仔個樣愈o黎愈鈍,個口擘擘下,口水條條fing。

睇完喇,佢呆呆咁離開,好似黃德斌拍拍佢o既膊頭,恭喜佢咁話:恭喜你成為「T低Beople」的一份子!


講完


星期日, 10月 22, 2006

故事27:寫唔落手


今日,老師教左「美」「醜」兩個字,然後叫同學用依兩個字作文,自由題。同學仔聽到自由題就滴晒汗,唔知寫乜,只好頂硬上啦。


有個女同學寫左一陣,就交左篇文俾老師睇:

從前有一隻 小鴨,牠長得非常 ,所以其他動物都不喜歡牠。牠為了擺脫 的型像,努力打扮,終於打扮成一隻美麗的天鵝,但是牠的骨子裡仍然是一隻 陋的小鴨。

老師:點解你篇文冇晒個醜字o既?
女同學:個醜字咁醜,叫人點寫得落手o者?


講完


星期五, 10月 20, 2006

故事26:扮死的蟹


一班大閘蟹o係湖邊玩,忽然兩個賊眉賊眼o既男人出現。班蟹知道有人要捉佢地,於是即刻搵地方匿埋。其中兩隻蟹走得慢,o黎唔切匿埋,於是決定反肚扮死。


兩個男人o黎到,見到兩隻死蟹即刻雙眼發光,執起佢地放入膠袋,仲揭起D石頭o黎睇,其他蟹好驚,紛紛走夾唔抖。兩個男人見到統地都係蟹,但一D興趣都冇,冇幾耐就走左喇。

D蟹呆晒,唔明點解自己會逃過大難,更唔明兩隻扮死的同伴點解會俾人捉左。

兩個男人返上車,傾計咁話:又會得兩隻死蟹咁少,死蟹當真蟹賣先值錢嘛。

兩隻扮死o既蟹只覺死唔眼閉。


講完


星期一, 10月 16, 2006

故事25:十個返學的細路


一朝早,十個細路出門口去返學。


第一個走出門口冇幾遠,「bob」一聲就唔見左。
第二個行過兩條街,貪快行草地,「bob」一聲就唔見左。
第三個跑過草地,一行上泥路,「bob」一聲就唔見左。
第四個一邊行一邊食包,咬到第三啖,「bob」一聲就唔見左。
第五個等公車返學,o係車站附近行行下,「bob」一聲就唔見左。
第六個上左公車,司機走捷徑,「bob」一聲就連人帶車唔見左。
第七個落左公車,見到學校喇,但行多幾步,「bob」一聲就唔見左。
第八個行行下張notes吹走左,佢追呀追,「bob」一聲就唔見左。
第九個去到學校門口咁滯,有同學叫佢,佢走過去,「bob」一聲就唔見左。
第十個返到學校,去廁所時,揀左格平時冇去過o既,痾痾下「bob」一聲就唔見左。

果日,有十個地雷o係世上消失。


講完


星期五, 10月 13, 2006

故事24:香港印象


達洋去考幼稚園,老師為了看看牠吸引的SA、DHA、ARA
、鋅、Omega及Taurine是否足夠,於是出一個題目考考牠。

老師:達洋,不如你在黑板上畫個香港俾我睇丫。
達洋:啊。

達洋拎起一支粉筆,在黑板上畫了一個小圓圈,然後塗白它。

達洋:畫完。
老師:嘩!好叻喎!o係你心目中,香港係好細個o既,係咪?
達洋:老師你錯啦,我畫o既依個係海。
老師:下?海?咁香港呢?我叫你畫香港喎。
達洋:白色依撻係海,其餘黑色o既地方就係香港啦。
老師:香港咁大架咩?
達洋:香港愈o黎愈大啦,大到連個海都冇埋。


講完


星期三, 10月 11, 2006

故事23:青蛙王子


一日公主在庭園裡飲high tea,她十八歲,是個妙齡、發春少女,心裡只想著快點遇上白馬王子。她食飽撐住個肚,在荷塘邊看見一隻戴著小皇冠的青蛙。公主眼前一亮,蹲下來跟青蛙說話。


公主:你是王子嗎?
青蛙搖搖頭。
公主:你明明戴住個皇冠喎!
青蛙即刻除低個皇冠。
公主:o黎啦!等我錫你一啖,你就會回復原貌啦!
青蛙嚇到即刻跳開。
公主:咪走!

公主追住青蛙,然後一手捉住佢,豬起個嘴……

青蛙:唔好錫我!求求你!
公主:你唔想變返王子咩?
青蛙:唔想!唔想!
公主:你變返王子,我地就可以成親啦!

公主一啖錫落去,然後放青蛙在地上,青蛙轉眼間變回人的模樣。但係當王子抬起頭時,公主就嚇到花容失色啦。

公主:點……解……(暈左)
王子(摙住公主條頸,大哭):我都話架啦……我個樣本來就生到同青蛙一樣……我先請巫婆變我做青蛙之嘛……我做青蛙都可以享齊人之福丫,而家做返人搵鬼要我咩,你破壞左我一生喇……

講完


星期二, 10月 10, 2006

故事22:靠嚇


在一個天災連年、人民活在貧窮的遙遠國度。大祭師在祭壇上,跟所有的人民說:「o黎啦!你地拎晒D 食物、課本同藥物出o黎,我地拎去祭天,上天自然就會俾更多o野我地架啦。」


人民聽從他,把自己家裡僅有的食物、書和藥物拿出來,士兵再將這一切縛在火箭上,點火……火箭飛呀飛,飛上天空看不見了,但等了很久很久,上天連粒米也沒有掉下來。

大祭師見計劃失敗,於是把行動升級,下令將全國的農舍、學校、醫院都縛在火箭上,點火……火箭飛呀飛,在上空「轟」一聲爆炸,爆出好靚好震撼的煙花。

人民:乜唔係俾上天架咩?做咩炸晒D o野?
大祭師:唔嚇下個天佢唔知驚架!


講完


星期六, 10月 07, 2006

故事21:寫故事的貓


很久很久以前,地球上出現過史前文明,甚至太陽系上其他行星,一樣存在過智慧生物。不過有一日,在遙遠的宇宙來了一個外星民族,非常高科技,八大行星的生物都不是它們的對手。這班外星人向八大行星的生物宣佈,只要他們進貢星球上最寶貴的東西,就可以免死,其實這是一個詭計,外星人只是想知道八大行星有什麼正o野,看看哪個星球有佔領的價值。


幾日後,八大行星的代表都來到外星人的太空船,進貢他們帶來的東西。

水星人帶來大大塊水晶,外星人的反應是:咁醜o既舊石頭。
金星人帶來一個女人,外星人的反應是:瘦o左D喎。
火星人帶來一個男人,外星人星佢幾巴:都冇乜火o既?
土星人帶來它們的光環,外星人的反應是:好靚,但冇位擺。
木星人帶來一個雷電,外星人的應是:順便幫我地隻船叉叉電丫。
天王星人帶來一舊石,外星人的應是:咦!塊水晶唔錯喎!
海王星人帶來一塊冰,外星人的反應是:玩玩下唔見左o既,好得意呀!

當時地球還沒有人,於是派來一隻貓,貓遞上一大卷羊皮紙。
外星人:咩o黎架?
貓:我寫o既故事。
外星人讀o左少少,好唔鍾意,一手丟o左去,仲押隻貓返落地球。

外星人見地球最窮,沒有什麼值錢的,於是只攻打其餘七個行星,殺晒上面的生物,搶晒D資源,然後飛去第二個星系,一去不返。

光陰似箭,日月如梭。那卷故事一直下落不明,直到1947年,一個牧童
在死海西北方的一座洞穴裡發現一大卷羊皮紙,上面寫滿故事,震驚世界,考古學家稱之為死海古卷

講完


星期四, 10月 05, 2006

故事20:達洋大師之邊粒魚蛋最幸福?


人山人海的花園街上,有形形色色的小食檔。有隻戴住太陽眼睛的貓來到魚蛋檔,想買串魚蛋,感受一下香港的地道美食。


貓:俾串辣魚蛋我丫。
老闆(吉五粒魚蛋):七蚊。
貓:我得五蚊咋。
老闆:唔夠錢唔好學人食魚蛋啦!
貓:俾三粒我丫。
老闆:冇呀!過主!

貓正想離開,卻被旁邊的人撞跌太陽眼睛,老闆睇真D,原來係達洋大師呀!

老闆:達洋大師o黎左呀!達洋大師o黎左呀!

好快,整個旺角的人都圍住達洋大師,想聽佢講道。老闆還送了多串魚蛋俾佢。達洋大師舉起一串魚蛋,就問喇:你地認為,依度邊粒魚蛋最幸福?

大家諗左一陣,一個阿叔就話:最後果粒,因為佢最後先俾人食落肚。

似乎好多香港人都認同這個答案,和議的聲音此起彼落。

依個時候,一個小女孩話:應該係最頂果粒先o岩,因為佢可以第一個奉獻自己。

大家聽落覺得又有道理啊,雖然冇人想奉獻自己。

達洋大師:錯晒。最幸福o既係中間果粒,因為佢可以左擁右抱。講完。


星期三, 10月 04, 2006

故事19:簡約月餅


中秋來了,滴滴仔睇到月餅簡約包裝的廣告,心思思想去買月餅。


他落街去搵月餅買,但沒有一間餅店的月餅包裝令他滿意,全部都唔夠環保。

行行下,他經過一個魚蛋檔,竟然見到寫住:簡約月餅大平賣!於是滴滴仔就好奇咁行埋去問下喇。

滴滴仔:乜依度都有月餅買架咩?
老闆娘:梗係有啦。
滴滴仔:係唔係簡約包裝o既先?
老闆娘:簡約到冇人有呀,你要辣定唔辣丫?
滴滴仔:咁我試下辣啦。

老闆娘於是拿起一枝長竹籤,放入兜咖哩汁度吉吉吉,吉左四個月餅出o黎。

老闆娘:俾錢!

講完


星期二, 10月 03, 2006

故事18:Skin Head丫唔該


滴滴仔今日去剪髮,佢一坐低,就有個靚仔髮型師搭佢膊頭話:點剪呀?


佢嚇到縮一縮,然後話: 唔……skin head丫唔該。
髮型師:唔好意思,剪skin head個師傅今日休息啊。
滴滴仔:咁呀……木村頭啦。
髮型師:剪木村頭個師傅今日病左呀。
滴滴仔:爆炸頭得喇呱?
髮型師:剪爆炸頭個師傅都炸傷左o者。
滴滴仔(滴汗):咁求其陸軍裝啦。
髮型師(蓮花手):哎o也,陸軍裝依D咁common我地唔剪架。
滴滴仔:唉,咁你話事啦。
髮型師:放心喎,我係依度首席髮型師o黎架。

滴滴仔無晒心機,於是低頭狂煲雜誌,等到佢再抬頭望望塊鏡,嚇到傻左。

滴滴仔:搞咩呀你!
髮型師:我最叻擯辮架啦。


講完


星期日, 10月 01, 2006

故事17:小巴哈囉喂


凌晨時分,冷清清o既馬路邊。駝背甩頭鬼同長髮無腳女鬼o係度係咁望錶。


長髮無腳女鬼:Yeah!夠鐘啦。
駝背甩頭鬼:你咁興奮o既?
長髮無腳女鬼:梗係啦,等左成年先到萬聖節,我等嚇人等左好耐架啦。
駝背甩頭鬼:但都唔駛o係依度嚇人架。
長髮無腳女鬼:依度夠刺激嘛,見住D小巴翻車好過癮架。

依個時候,一架通宵紅色小巴高速駛過o黎。車上面o既速度顯示器不停咁咇咇叫。

長髮無腳女鬼:o黎啦!睇我o既厲害!

長髮無腳女鬼「竄」一聲o係馬路中心現身。小巴司機見到,嚇到標尿,但係轉個頭又諗:橫死掂死,都係兜多轉、賺多個錢緊要D!於是「蓬」一聲衝過去,長髮無腳女鬼「呀」一聲慘叫,被架小巴撞到散晒。

駝背甩頭鬼:唔記得同佢講,時速70公里以上o既小巴,會撞到我地魂飛魄散o既添。


講完


星期六, 9月 30, 2006

故事16:醜小鴨(獠牙版)


春天o黎啦,又係萬物欣欣向榮o既時候,鴨媽媽的BB都出世囉,六隻鴨仔生生猛猛,只係有一隻特別樣衰,唔單止個頭特別大、皮膚又乾又鞋,而且對翼又瘦猛猛。


鴨爸爸:依個真係我地個仔呀?乜依對係翼o黎架咩?
鴨媽媽:咪就係你D 基因有問題之嘛。

醜小鴨唔單止醜樣,仲好大食,一日食成斤魚,令鴨家庭o既經濟大受打擊。爸爸媽媽同兄弟姐妹都唔鍾意佢,仲成日取笑佢係異形添!

醜小鴨愈o黎愈唔開心,最後決定離家出走。佢走呀走,都唔知去邊,肚餓又冇o野食。依個時候,佢遇到老眼紛花o既水牛伯伯。

水牛伯伯:小朋友,未見過你喎,你o係咩o黎架?
醜小鴨:我係鴨仔囉。
水牛伯伯:鴨仔有咁強壯o架咩?做咩得你一個o既?
醜小鴨:我屋企人都嫌我太醜樣,唔要我。
水牛伯伯:傻孩子,我聽人講過,醜小鴨其實係天鵝,大個就會好靚架啦!
醜小鴨:真o既?多謝你呀水牛伯伯!

醜小鴨錫左水牛伯伯一啖,然後繼續上路。佢唔知道因為自己o既一吻,令水牛伯伯D血標晒出o黎,最後捱唔住,暈低左添。

醜小鴨o黎到一個湖,湖裡面有幾隻天鵝游水,佢見到天鵝咁靚,又諗到自己大個會變成天鵝,梗係衝埋去游埋一份啦!點知天鵝見到佢走埋o黎,驚到即刻飛走。

醜小鴨:仲咩咁驚喎,我夠係天鵝囉……

依個時候,醜小鴨先發現個地下「bobobo」咁震起上o黎,佢望一望後面,見到一隻大暴龍,嚇到腳仔都軟埋。

醜小鴨:你……你係……
大暴龍:我咪係暴龍囉,咁都要問?

大暴龍溫柔咁笑,成棚獠牙好似利刀咁閃令令。
醜小鴨嚇到即刻跳落水,游呀游,有咁遠游咁遠。

大暴龍:小朋友你做乜咁驚呀?你自己咪一樣!

醜小鴨聽到依句,完全呆晒,佢望下倒映o係湖水上面o既自己,又真係同暴龍生得一模一樣……


講完


星期三, 9月 27, 2006

故事15:A Lying Ape


有日,猿人不請自來,去到小山羊、小野豬和小水牛住o既地方。


小山羊:猿人,好耐冇見啦,咩風吹你o黎呀?
猿人:我掛住你o地嘛,咪o黎探下你o地囉。
小野豬:你好似有D唔同o左喎!
猿人:咦!你咁都留意到呀?

原來猿人從前係四隻腳行路架,但佢今日就用兩隻腳行路,另外兩隻腳就放o係背脊。

小水牛:你做咩兩隻腳行路呀?
猿人:果兩隻唔係腳啦,係手先o岩,你估下有咩用。
小山羊:你背脊痕!
猿人搖搖頭,陰陰嘴笑。
小野豬:留返兩隻手挖鼻屎!
猿人:我先冇你咁多鼻屎!
小水牛:留返兩隻手打PSP!
猿人:冇錢買喎!其實呢,留返兩隻手係要o黎整份禮物俾你o地o既。
小山羊:太客氣啦,係咩禮物呀?
猿人(o係背脊拎D o野出o黎):你o地睇下,係一個網呀!
小水牛:咩o野叫做網呀?

猿人冇答佢,「蓬」一聲用個網捉晒小山羊、小野豬同小水牛,拖返自己住o既山窿食火鍋。

依件事傳o左出去,從此以後,人類就冇晒大自然o既朋友喇。


講完。


星期二, 9月 26, 2006

故事14:大撤退


有一日,大地震盪,世界末日蒞臨啦!兩條蟲為o左保住命仔,就諗辦法逃離地球。


蟲仔A:點算呀!
蟲仔B:梗係撤退啦!
蟲仔A:走去邊呀?
蟲仔B:去火星啦,最近架喇。
蟲仔A:點走喎?
蟲仔B:我諗o係地下一路鑽,鑽鑽下就會到火星呱。
蟲仔A:試下啦。

佢地不停鑽呀鑽,鑽穿左地球,又真係俾佢地鑽到另一個星球喎。佢地回頭一望,地球已經唔見左。 當佢地以為冇事啦,點知火星又大地震,佢地好驚,於是又鑽呀鑽,鑽到土星、木星、天王星、海王星……

蟲仔A:死啦,海王星都震埋!
蟲仔B:都仲有得鑽,鑽去冥王星。
蟲仔A:我聽人講,冥王星冇左架喇喎。
蟲仔B:係降格左做矮行星之嘛。
蟲仔A:咁有一線生機都好。

於是佢地又鑽,鑽穿左海王星,然後pat一聲撻左落地。

蟲仔A:好痛呀。依度就係冥王星?乜大咁多o既?
蟲仔B:唔知喎,而且好鬼燦眼。

女女:媽咪!有兩條蟲鑽左出o黎呀!
媽咪:哎o也(即刻掉低個蘋果),阿女走啦,唔好買依D爛蘋果呀。


講完


星期一, 9月 25, 2006

故事13:乜都係個Bomb!


滴滴仔一向愛好和平,咁多年o黎佢出糧就去買下衫,月尾冇錢就去食漢堡包,如果有餘錢又心情好仲會捐助一D福利機構添!佢從來都冇害過人,最討厭恐怖份子。


不過佢估唔到,當佢買左件501,o係屋企「啪」好粒褲鈕時,世上另一個角落就「Bob」一聲爆炸,好多家族舖仔炸到散晒,然後空地上就起o左好多連鎖店同百貨公司;又有好多工人「啪」一聲扣好自己o既褲鈕,勒緊褲頭,因為做成個月都未必夠錢開飯。

等到滴滴仔咬漢堡包,世上另一個角落又「Bob」一聲爆炸,爆雨林、爆農田、爆牧場,連D人o既脂肪都大爆發!積o係個肚度dum下dum下。

後來呢,滴滴仔良心發現,決定盡地一舖!自己做個炸彈,炸炸迪迪尼。佢混入自由行遊客入面,偷偷擺個炸彈o係門口,然後走到無雷公咁遠,撳個遙控器!

「彭」!

遙控器爆左,炸彈就乜事都冇。因為滴滴仔除左返工、買衫同食包,根本乜都唔識。


講完

(靈感來自台灣詩人鴻鴻作品:郵包炸彈客)


星期六, 9月 23, 2006

故事12:漁夫和惡魔


漁夫每日都去湖邊打漁,但係今日好黑仔,打極都冇。

佢撒最後一次網,打算冇魚就返屋企啦,點知今次網到一個玻璃樽。
樽裡面有D o野郁郁下,漁夫好奇打開o黎睇,點知一陣煙飄左出o黎!
陣煙化成一隻巨大的惡魔,嚇到漁夫仆o係地下。

惡魔:就係你放我出o黎?
漁夫:唔……唔係……
惡魔:咁我就食左你填飽個肚先!
漁夫:係我放你架!我放你架。
惡魔:咁我就更加要食左你!
漁夫:點……點解?
惡魔:一千年前,我俾人打敗收入樽裡面,我發誓會賜三個願望俾救我的人。但五百年都冇人救我,我就決定要把救我的人食落肚。

惡魔愈諗愈嬲,大叫一聲,o係口裡面噴出一陣風,風所到之處,所有o野都化成灰燼……
漁夫:好……好厲害……
惡魔:梗係,我可以將一切o既o野急速分解。

漁夫唔想成為惡魔的晚餐,心生一計,走呀走,走返屋企。
惡魔行兩步路等於佢走一百步,話咁快就追上o黎喇。

漁夫(拎住屋企o既一個樽):你講大話。
惡魔:邊有o者?
漁夫:你咁大舊,有乜理由o係個樽出o黎?
惡魔:我係威力無窮o既惡魔,唔講大話!
漁夫:咁你返入個樽再出o黎俾我睇,我就心甘情願俾你食落肚。
惡魔(諗左一陣):你當我懞架?我一返入去你就栓實個樽蓋啦。
漁夫:……(俾佢估到)……車!係你傻之嘛,你可以急速分解 D o野,一樣可以分解個樽。
惡魔:係喎!玻璃樽之嘛……哎呀!乜我諗唔到!
漁夫:你試一次o黎睇下。

於是,惡魔又化成一陣煙入返個樽,漁夫馬上栓實樽蓋!
惡魔哈哈兩聲,噴出分解風,但個樽竟然一D事都冇……

惡魔:點解會咁架……
漁夫:依個係膠樽o黎架!


講完


星期四, 9月 21, 2006

故事11:快閃媽媽


一個女人夜晚行返屋企,突然間路邊閃出兩個超人打扮o既人!


紅色超人:小姐!我地係「快閃……
女人「嘩」一聲嚇到掉頭走!
黃色超人:小姐,我地係「快閃軟硬超人」,冇惡意架。
紅色超人:我地只係想請你試下星星薯餅o者。
依個時候,軟硬超人背後出現一隻大怪獸
黃色超人:原來佢係俾隻怪獸嚇親,看招!星星薯餅!
……

女人返到屋企,佢個三十幾歲o既女見佢面青青。
女:阿媽,你咩事咁驚呀?
女人:女呀!我遇到「快閃強姦黨」呀!嚇得我丫!


講完


星期三, 9月 20, 2006

故事10:達洋大師


達洋大師係一位智者,懷住菩薩心腸,環遊世界,幫助活o係苦難裡面o既人。


佢每去到一個地方,都會觀察當地人o既生活,然後靜坐冥想,直至悟出道理幫依班人為止。佢平日好少講o野,但係就字字珠璣,充滿大智慧。

今次佢去到一個小市鎮,o係山頂靜坐冥想,D人知道達洋大師o黎o左,全部請假湧晒上山,由山頂排到山腳,希望聽到大師o既一言半語,可以「叮」一聲甩難。

佢地等左七日七夜,比倒扁人士更有耐性,終於,o係一個月黑風高o既夜晚,達洋大師終於擘大對眼,講o野喇!


達洋大師:講完。


星期二, 9月 19, 2006

故事9:人肉360


爸爸、媽媽同個女坐纜車,細路女好可愛,一路睇風景一路嘻嘻笑。
同一時間,一班大隻佬「唏呵唏呵」,渾身是勁。
爸爸幫女女拍照留念,玩得好開心。
大隻佬全身閃令令,肌肉發達,係咁流汗。
女女見到纜車下面D人同車好似積木咁,捉住媽媽問E問路。
百幾個大隻佬好似撐龍舟咁,好齊咁扯住一條大鋼纜。「唏呵唏呵」。

同一時間,o係可以望到纜車的高級餐廳裡面,纜車公司總裁A同B食飯。
總裁A:機械成日故障,始終靠唔住。
總裁B:都係人手穩陣D!
總裁A:我地叫360,就係因為山上有180個,山下又有180個大隻佬拉郁D纜車。
總裁B:仲勁過少林寺十八銅人。
總裁A:梗係!一定帶旺旅遊業啦。

爸爸、媽媽同女女終於上到大佛,走落纜車。女女見到有180個大隻佬o係度,就揮手同佢地打招呼。大隻佬見到細路女咁可愛,一時忍唔住同佢揮手say hi,鋼纜甩手……

總裁A同B望住條纜飛左落山。
山下面o既180個大隻佬好似骨牌咁仆直。


講完


星期一, 9月 18, 2006

故事8:波地混戰


大晴天,一班著晒綠色衫o既o靚仔o係球場踢波。球來球往,將個波不斷輸送,為隊友製造入球。砰零彭爛,大家不知幾開心。


突然落起大雨,個波碌到一邊,o靚仔跑去執波時,一班身穿紅衫o既o靚仔出現,帶頭果個咪聲唔出,「彭」一聲踩爆左個波。

綠衫o靚仔怒吼:你做咩踩扁佢呀!

結果雙方混戰,上演一場爛仔交。


講完


星期六, 9月 16, 2006

故事7:幪面超人555,和他的戰友。

幪面超人555今天又來左「伸張正義」,教訓一隻「無辜」既惡魔。

不過今次隻惡魔由於生活習慣比幪面超人555健康得多,實力好強,連幪面超人555都唔係佢果皮。於是幪面超人555馬上急call戰友來幫忙。就係千鈞一髮之際,戰友騎著單車黎到,化解危機!

幪面超人555:謝謝你,你是?
戰友:我係幪面超人444!
幪面超人555:444,我地一齊出絕招打低佢啦!
幪面超人444:好!
幪面超人555:絕招!五加皮重拳!
幪面超人444:絕招!四仔死光!

兩招果然威力無窮,惡魔俾佢地打到死死下,再無還手之力。正當幪面超人555和444打算換衫收工之際,另一隻惡魔又出現了!而且個樣被之前果隻更邪惡、兇猛。

幪面超人555:乜今日咁忙既?
幪面超人444:我地再出絕招,夾手夾腳做低佢啦。

於是幪面超人555和444再次使出絕招,將惡魔打到落花流水。

惡魔:呀……你地做乜打我……又係你call我黎既……
幪面超人555:我幾時有call你黎?
惡魔:你call戰友……嘛……我係幪面超人666呀……


講完


星期日, 8月 27, 2006

故事6:和尚和馬騮

話說有隻馬騮因為太頑皮,被佛祖壓o係腳指山下,佢好唔開心,大吵大嚷,聖母瑪麗亞就飄過黎睇下咩事。
聖母瑪麗亞:馬騮做乜咁嘈?
馬騮:我唔要被壓住!我要離開依度!
聖母瑪麗亞:你唔駛怕,等五百年後,就有隻和尚來救你。
馬騮:五百年咁耐?
聖母瑪麗亞:眨下眼就過啦。
聖母瑪麗亞講完依句就走左,而馬騮眨下眼,又真係過左五百年。

有一日,有人騎住馬黎到腳指山,馬騮見佢光頭,就大叫:和尚!和尚!
和尚:你識得我?
馬騮:梗係啦,你係黎救我的和尚。
和尚:啊,你就係頑皮馬騮,聖母瑪麗亞都同我提過。
馬騮:咁你快D推開座山啦。
和尚於是摺高衫袖,運勁一推!
腳指山郁都冇郁過。
馬騮:唔係呱?你有冇食飯?
和尚:你唔使緊張,我有辦法。
和尚講完,又摺高衫袖,用雙手o係山上挖挖挖。
馬騮:嘩!你愚公移山呀?
和尚:唔係,你睇。
原來石上有個感應器,不過五百年間俾沙塵封住左。
和尚於是o係布袋拎個錢包出黎,放o係感應器上。嘟~~~感應器顯示,扣左$5.5
腳指山就一分為二,馬騮終於走返出黎喇。
馬騮:依件法寶好厲害啊!
和尚:梗係啦,備足輔幣八達通,天竺取經好輕鬆。


講完



星期四, 8月 24, 2006

故事5:駱駝和商人



商人騎住駱駝o係沙漠經商時蕩失路,搵唔到市鎮,而糧水又差唔多食晒。


烈日當空,沙漠好似塊燒紅左o既鐵板,忽然駱駝好興奮咁叫。
駱駝:主人!前面有綠洲呀!
商人:咩綠洲丫,係海市蜃樓呀。掉頭走啦!
於是駱駝只好掉頭走,走左冇耐,又俾佢見到遠處有個市鎮。
駱駝:主人!市鎮呀!搵到啦!
商人:蠢材,係海市蜃樓呀。走啦!
駱駝:又係海市蜃樓?
佢地又行左大半日,唔經唔覺走左上一條公路。
駱駝:咦,依度竟然有條公路。
商人:公咩路丫,係海市……
駱駝:唔係喎,踩上去咯咯聲架!
商人:係?咁我地休息一下,一陣沿住公路走,就搵到市鎮架啦。

駱駝同商人坐o係公路上休息,忽然遠處有架吉普車風馳電掣咁駛埋o黎。
駱駝:主人!有車呀!快D匿埋一邊啦!
商人(望望架車):車咩丫!海市蜃樓之嘛。
駱駝:唔係哩!真係有車!
商人:你要走自己走!
駱駝驚到急急腳走埋一邊,回頭見到架吉普車將商人撞低左,然後不顧而去。

駱駝:主人!主人!
駱駝走番上公路,但搵o黎搵去都唔見商人條屍喎。
駱駝:主人,你死左去邊呀?
原來商人已經走到好遠,仲擰轉頭向住駱駝招手添。
商人:你隻死野做乜咒我死呀,都話係海市蜃樓咯!


講完


星期三, 8月 16, 2006

故事4:薩基路與拉撒路



加旋係魔界妖怪,被送到人間參與魔王爭霸戰,魔王爭霸戰o既規例係妖怪必需搵到能發揮妖怪「能力」之書o既拍擋,跟其餘99隻妖怪決戰,死剩種妖怪就能夠成為魔界之王。


加旋o既拍檔係中學生高嶺清麻呂,擁有天才頭腦,加上加旋o既戰鬥中不斷成長,二人變得非常強橫,毫無敵手。而加旋o既成名絕招係「薩基路」,只要清麻呂照住妖怪之書上o既咒語唸出「薩基路」,加旋就可以o係口度噴出雷電,電瓜敵人。多講無謂,詳情請睇漫畫《魔界小金毛》。

話說有一日,又有妖怪o黎挑戰加旋喇。對手係一個好似拉登o既男人,而妖怪就係一個細路哥咁。為左唔傷害到其他人,清麻呂同對手係石礦場戰鬥。

清麻呂:薩基路!
咒語一出,加旋張大個口噴出雷電,將細路哥電到出煙。
拉登男:嘩,依招好厲害!
細路哥爬起身,向加旋衝過去。
清麻呂:薩基路!
又電多次,細路哥仲飛到石牆上,轟一聲,石牆穿個大窿。
拉登男好緊張咁走去睇下細路哥。
拉登男:細……細路哥死左喇……
清麻呂:搞掂,加旋我地走啦。
加旋:嗚啊!
拉登男見到細路哥死左,好傷心,仲流眼淚。

清麻呂:出手太重吧?
拉登男:等陣……我地未輸……
清麻呂:@o@"
於是拉登男打開妖怪之書唸咒語:拉撒路*!
細路哥聽到咒語,竟然企返起身,一D事都冇,鬼打咁精神。
清麻呂:依個敵人會復活?
拉登男:你殺佢幾多次,佢都係會復活架啦!

加旋:清麻呂,我地唔夠打喎……
清麻呂:真係唔認輸都唔得咯……

結果清麻呂同加旋就輸左喇……


講完


*拉撒路是《聖經》人物,耶穌很喜歡他,但後來他因病而死,死後四天耶穌來到,其他人都覺得耶穌來遲了,因為之前耶穌只行過治病神蹟,耶穌走到他的墳去,叫他的名字,令他從死裡復活。而拉撒路的意思,就是「神是我的幫助」。

星期二, 8月 15, 2006

故事3:知魚之樂

一日,莊子同朋友行行下……

朋友:你睇,依條魚幾開心。
莊子:你都唔係魚,你又知條魚開心?
朋友:你夠唔係我,點知我唔知o者?
莊子:我唔係你,所以唔知你知唔知,但你都唔係魚,你一樣唔知條魚開唔開心架。
朋友:冇你咁好氣……拿!依條魚就一定開心喇!
莊子:點解呀?
朋友:因為佢住緊個魚缸貼o左優質海水標籤。
莊子:係喎……
魚:我唔開心就真!
莊子&朋友:點解唔開心呀?
魚:因為有兩個傻佬o係度嘈之閉。

莊子黑住面,轉身揮揮手:Waiter!
Waiter:有咩幫到你呢?
莊子:我要依條魚,麻煩幫我清蒸。


講完

星期一, 8月 14, 2006

故事2:非要三文魚不可



滴滴仔同屋企人住係貧民窟,爸爸媽媽打工做到半死,只得三餐溫飽。

有一日爸爸突然病左,滴滴仔請黎大夫,大夫睇過病後話:「要醫好佢,就要一條三文魚。」
三文魚係當地賣三蚊一條,貴到無倫,於是滴滴仔決定到北面湖泊捉魚。

果時係冬天,湖面結晒冰,滴滴仔好孝順,決定用體溫溶冰。等左好耐好耐,終於湖面溶開一個窿。滴滴仔釣來釣去都冇魚,但佢一諗到爸爸個病,就連腳仔凍到震都唔走(其實係走唔郁)。依個時候,有個仙女係湖水度升上黎,嚇左滴滴仔一跳。

仙女:小朋友,你搵乜呀?
滴滴仔:我搵三文魚。
仙女:啊!你等等。

仙女又沉落湖下面,冇幾耐升上黎。
仙女:依條啦。
滴滴仔:唔係依條,依條係秋刀魚。
仙女:燒秋刀魚好食。
滴滴仔:我只係要三文魚。
仙女:你等等。(又沉又升)依條?
滴滴仔:……依條係吞拿魚。
仙女:貴過三文魚。
滴滴仔:我都話要三文魚咯!
仙女:你再等等。

冇幾耐,成個湖震晒,湖面裂開,滴滴仔驚到爬埋一邊。
仙女:依條啦!
滴滴仔:……依……依條係……鯨魚。
仙女:有賺啦你。
滴滴仔:唔要!我只係要三文魚。
仙女:真係咁決絕?
滴滴仔:係!三文魚可以醫爸爸既病。
仙女:依個湖冇三文魚……
滴滴仔:@0@"
仙女:如果你想搵三文魚,爬過果座山,沿河既上流走就搵到架啦。
滴滴仔:謝謝你,我而家就去。

為左幫滴滴仔,仙女俾左三個錦囊佢,叫佢遇到難關時打開。
滴滴仔向山腳走,途經樹林,突然被一群狼狗包圍,隻隻流晒口水,想食左佢。
滴滴仔走唔甩,惟有打開第一個錦囊。
滴滴仔:香腸?(佢其實好肚餓)
狼狗追上黎,佢驚到跌左條腸,結果狼狗追住碌腸,佢先保住條命。

上到山,要行過又窄又斜既山路,一邊仲有懸崖。
滴滴仔行到冇晒力,真係頂唔住,於是打開第二個錦囊。
滴滴仔:一隻鑊?(可惜腸仔已經跌左,冇得煮黎食)
佢?住隻鑊繼續行,唔小心踢左粒石仔落懸崖,引起巨響,成個山谷都聽到。
就係依個時候,山上的石頭碌晒落黎,滴滴仔即刻用隻鑊擋住,總算逃過一劫。

過左座山,滴滴仔向住河既上流走,黎到一座瀑布前。為左爸爸,佢用盡九牛二虎之力爬上去。跌完一次又一次,成身傷晒。
滴滴仔:冇辦法爬上去,我放棄啦,惟有打開第三個錦囊。
滴滴仔於是打開第三個錦囊,拎左一樣野出黎。
滴滴仔:@0@"

第三個錦囊裡面有條三文魚。

講完


星期日, 8月 13, 2006

故事1:早餐的對話



天矇光,荷包蛋訓醒見到香腸。


荷包蛋:早晨,我叫荷包蛋,你呢?
香腸:早晨,荷包蛋,我係香腸。
咖啡:兩位好,我叫咖啡。
荷包蛋:我地明明第一次見面,但我總係營住成日都同你地講早晨。
香腸:我都覺,好似發夢發過而家既場面,而且仲好多次。
咖啡:我都係,直頭好似前世見過你地。
荷包蛋:我們前世係咪好親既人呢?
香腸:應該係仇人。
荷包蛋:可能香腸你前世吉穿過我個蛋黃。
咖啡:可能前世你地推跌過隻杯,搞到我一地都係。
香腸:我地都冇手既。
咖啡:……
荷包蛋:喂,你地睇下,旁邊有刀又有叉。
香腸:係,我一早見過咁既場面,唔記得幾時。
咖啡:預感到有恐怖既事發生。
荷包蛋:你意思係我地會死?
香腸:的確有咁既預感,可能前世我地既結局都一樣。
咖啡:我地下世會再見嗎?
荷包蛋:我寧願見到多士,都唔見你地。
咖啡:如果再見面既話,我希望我地既對話唔好再咁無聊。
香腸:話時話,最好下世我同荷包蛋身上唔好再有一層臭崩崩既油。

講完。